~මන්දාකිණිය~

අවසරයි එහෙනම්..!!

~මන්දාකිණි~ — Mon, 07 Nov 2011 03:00:31 +0000

අත් අල්ලගෙන
හිටිය එක මොහොතක්..
පපු තුරේ හිස
තබා ගත් දිනයක්..
කඳුළු සඟවා
සිනාසුණු මතකක්..
අරන් යන්නෙමි
කොපුල මත තැබු
එකම එක සුසුමක්..
සොහොන් කොත මත
තනිව වැලපෙයි
ඔබ තබා ගිය
උණුම උණු කඳුළක්..
……………
අවසරයි එහෙනම්..!!

෴ කවි෴

~මන්දාකිණි~ — Sat, 05 Nov 2011 04:56:01 +0000

සුසුම් සඟවා
දුරක
පා කරන්නට හැකිය
කඳුළු හංගා
නෙතඟ
ලියා දෙන්නට හැකිය..
ලඟින් ඉන්නා
බවට
දැනෙන්නට හැරි හැකිය..
ආදරය
කරන බව
නොකියාම කිව හැකිය..

~පාට දේදුණු~

~මන්දාකිණි~ — Tue, 25 Oct 2011 17:37:47 +0000

දුක හිතෙන හීනෙක
පෙනෙන නොපෙනෙන ඈතක
දම් පාට අහසක
පාට දේදුණු තියෙන්නට හැක..

අත දිගු කල සැනින්
මැකී ගිය මොහොතක
වළාකුළු හෙමිහිට
හැරී බලනට ඇත…

සීත මිහිඳුම් සළුවක්
සමඟ නික්මෙන කන්දට
ඊට වැඩියෙන් මොහොතක්
නතර වෙන්නට නොහැකිය..

කණමැදිරි එළි එක දෙක
නිවී දැල්වෙන සවසක
කඳුළු බිඳුවක් පිටුපස
තරු තිගැස්සී සැඟවුණා…

සිහිනයක්..

~මන්දාකිණි~ — Fri, 14 Oct 2011 11:01:52 +0000

ඈත අහසේ
පාවෙලා යන
මේඝ මේ කුළු
සියක් දහසක්..

අතින් අල්ලා
ගන්න බැරි මුත්
නෙත් අයාගෙන
උසම කන්දක්..

කන්ද පාමුල
හිස නමාගෙන
රැළිති නගනා
දිය කඩිත්තක්..

කිසිත් නොදුටුව
ලෙසින් නිහඬව
බලා සිටිනා
පිච්ච කැකුළක්..

රාත්‍රිය විනිවිදිමි..

~මන්දාකිණි~ — Thu, 22 Sep 2011 18:57:12 +0000

රාත්‍රිය විනිවිදිමි
නිහඬවම කන් යොමමි..

දුර ඈත කඳු අතර
එක්තරා නිම්නයක
හෙමි හෙමින් ගලා යන
දිය පහරෙ හඬ අසමි..

සිහින් සර සර හඬින්
අතු අතර හිඳ ගයන
තුරු පතක දුක් ගීය
නොසෙල් වී අසා ඉමි..

නෙතින් ගිලිහෙන කඳුළු
බිඳු වැස්ස කර එවන
වළාකුළු අහස යට
නොපැකිලව ඇවිද යමි..

රාත්‍රිය විනිවිදිමි..
සසල සිත සඟව ගමි..

~මතකයකි මුදු සුවඳ~

~මන්දාකිණි~ — Sat, 27 Aug 2011 18:50:38 +0000

හමුව වෙන්වුනු
මතකයකි නුඹ
මුදු සුවඳ තවරලා
සිත මත..

අතින් අත ගෙන
ඇවිද ගිය මඟ
තනිව අද මම
ඔබ ගිහිං දුර..

මිටක් මොලවා
තබාගෙන ඇත
මතක ටික ටික
ඇවිත් ගිය දින..

අත්ල දිග හැර
මුදා හරිනෙමි
හෙමි හෙමින් ඒ
මතක සේරම..

මතක දල්වමි..

~මන්දාකිණි~ — Wed, 24 Aug 2011 13:55:21 +0000

තුමුල ගිරි හිස
සෙමින් පසු කර
නැගී එන සඳ
අසල නවතිමි..

ගෙවා ආ මඟ
දිහා හෙමි හිට
මතක දල්වා
හැරී බලනෙමි..

සයුර පාමුල
හැපී වැලපෙන
හිරුට සමුදී
යන්න කියනෙමි..

ඈත දිදුලන
පුංචි තරුවක
සිතේ තිබු මගේ
සතුට රඳවමි..

පාව යන කළු
වලාවක් මත
නෙතින් ගිලිහෙන
කඳුළු සඟවමි..

හමන සුළඟට
සුසුම් මුසු කර
ලොවෙන් සමු ගෙන
නික්ම යන්නෙමි…

මගේ සිහිනය තව ඇත…

~මන්දාකිණි~ — Tue, 26 Jul 2011 11:18:41 +0000

කලා සපුරණ සඳ
සුදු වැලි අතුල මිදුලට
එබිකම් කරයි හවසට..
අමාවක දා අඳුර මකනට
කණමැදිරියන් රෑනක්
එළි බෙදයි නොපැකිල..
සේපාලිකා ගස වට
තනිවට තනි රකින
කහ සමනළුන් රැල..
පිච්ච මල් ගාලම
සුදු පාට ඇඳගෙන
සුවඳ බෙදනවා උදයෙම..
නොනැවති ගලන ඇල දොළ
කිංකිණි හඩින් රහසින
ගී කියනවා සැම විට..
ගී අසන මින් රළ
තබමින් පාද තාලෙට
මනහර රැඟුම් විල මත..
………………………….
අදට නවතිමි මෙතැනින
මගේ සිහිනය තව ඇත…

මතක විතරක් ඉතිරි වෙන හැටි…

~මන්දාකිණි~ — Fri, 22 Jul 2011 13:08:42 +0000

අතීතයෙ එක් සොඳුරු දවසක
මගේ සිත ළඟ නුඹ සිටිය හැටි..
රෙබරෝසියා මල් වැස්ස මැද
හෙමි හෙමින් අපි ඇවිද ගිය හැටි..

හදිස්සියෙ ආ නපුරු සුළඟක්
අපව පසු කර හමා ගිය හැටි..
ඒ සුළඟ හා එක්ව එදවස
මා වෙතින් නුඹ නික්ම ගිය හැටි..

කාලයේ වැලි තලාවක් මැද
මසිත පමණක් තනිව ගිය හැටි..
මතක මං පෙත වසා දමමින්
අඳුරු තිර පට ඇඳී ගිය හැටි..

අහම්බෙන් මගෙ මතක අතරට
හදිස්සියෙ නුඹ ඇවිත් ගිය හැටි..
කොයි තරම් කල් බලා සිටියත්
ආයේ නම් නුඹ එන්නේ නැති හැටි..

~සිහින කැඩපත~

~මන්දාකිණි~ — Wed, 06 Jul 2011 18:07:24 +0000

සිහින කැඩපත තුලින්
යලි යලිත් දකිනෙමි
තරු දෙනෙත මුවා කර
කඳුළු බිඳු පිසලමි..

සඳ කුමරි හෙමි හෙමින්
නිසොල්මනෙ නික්ම යන
සොඳුරු මුදු පාන්දර
තිගැස්සී අවදි වෙමි..

ඔබ තබා ගිය සිහින
තවම ඇතියෙන් මහද
විවරවූ දොර අඟුළු
යලි තදින් වසා ගමි..

හද කවුළු දොර අසල
ඉටි පහන් දල්වලා
සුළඟ යන අත බලා
සුසුම් පා කරලමි

පෙර’ඹරින් හිරු නැගෙන
තුරු සරා මතක’තර
රහස් සඟවමි උදේ
පිපුණු මල් පෙති අතර..

‎~දනුෂ්කා නිෂාදී කුලරත්නගේ කවියක් නිසා ලියවුනකි~